တကယ်တော့ ကျွန်မတို့  ဆိုင်ကယ်က ဘီး ထပ်ပေါက်တာကြောင့် ရှေ့ က သွားတဲ့ ဆိုင်ကယ်တွေနဲ့  အဆက်ပြတ် သွားပါတယ်။ ဆိုင်ကယ် ဆက်သွားလို့  မရတဲ့အချိန်မှာ နောက်မှာ ကျန်ခဲ့တာက ကို 34 (thirtyfourhza.multiply.com) နဲ့  ညီမငယ် သဲစုလှိုင်တို့ ဆိုင်ကယ်ပါ။ ကိုသစ်တို့  ကိုသူရိန်တို့ ကတော့ အိမ်ကို ပြန်ရောက် သွားလောက်ပါပြီ။
ဒါနဲ့  စကား မစပ် မမချိုကို (ချို -ဒီဇိုင်နာ) ကို ဖုန်းဆက်လိုက်ပါသေးတယ်။ သူက ကျွန်မတို့  ဟင်္သာတက ဖုန်းဆက်တယ် ပြောတာကို သူက နောက်နေတယ် ထင်တာ။ နောက်မှ ကိုသူရိန်တို့  ကိုလင်းအောင်ပြည့်တို့  ကျွန်မတို့  ဒီအချိန်ကြီး အတူရှိနေကြ တာမို့ ယုံကြည် သွားတဲ့ပုံပါ။ (ဒီမမအကြောင်း မပါရင် မေးမဲ့သူ ရှိလို့  ကြိုရေးလိုက်ပါတယ်နော်)
ဒါနဲ့  ဆိုင်ကယ်ကို ပြင်ဆိုင်ပို့  နောက်ထပ် သူတို့ ရဲ့ ဆိုင်ကယ်၁စီးကို ထပ်ခေါ်ပါတယ်။ ည ၁၁နာရီ ထိုးခါ နီးနေပါပြီ။ ဆိုင်ကယ်ပြင် နေတာကို စောင့်ရင်း ကျွန်မ၊ သဲစု၊ ကိုလင်းအောင်ပြည့်၊ ကို34 နဲ့  သူငယ်ချင်း ၁ဦးတို့  ဟင်္သာတရဲ့ ညချမ်းအေးအေး လေးမှာ လဘက်ရည်ဆိုင် သွားထိုင်ကြပါတယ်။
ကိုလင်းအောင်ပြည့်ကတော့ လပွတ္တာ သွားစဉ်က သူ့ ကိုချန်ထားပြီး လဘက်ရည် ဆိုင် ထိုင်ကြတဲ့ကိစ္စကို လက်စားပြန်ချေတာလို့  ပြောပါတယ်။ (ကိုသစ်…ကိုလေ) ဒီဆိုင်လေးက အဝေးပြေး ကားဂိတ်အနီးမှာရှိပြီး မိုးလင်းအထိ ရောင်းတဲ့ ကိုလင်းအောင်ပြည့်တို့  ငယ်ငယ်ထဲက သောက်နေကျ လဘက်ရည်ဆိုင် လို့  ပြောပါတယ်။ အဲဒီမှာ ထွေရာလေးပါး ပြောကြ ရင်း ၁၂နာရီထိုးခါနီးမှ ကျန်တဲ့သူတွေ စောင့်နေကြ မယ်ဆိုပြီး ထပြန်လာကြပါတယ်။
အိမ်ရောက်တော့ ကျွန်မတို့ ကို မအိပ်သေးပဲ စောင့်နေကြတာကြောင့် ရောက်တာနဲ့  မနက်ဖြန် ဝေမဲ့ အ၀တ်ထုတ်တွေ အကုန်ဖြည် ကြပြီး အထုတ်လေးတွေ ပြန် ထုတ်ကြပါတယ်။ ပြီးတော့ ကျွန်မ ယူလာတဲ့ ငါးအူချောင်းတွေကို ချက်ဖို့ လိုအပ်တဲ့ ပစ္စည်းများကို ညနေ ရောက်စထဲက ဟင်းချက်ပေးမဲ့ အမေလှနဲ့  တိုင်ပင်ပြီး လိုအပ်တာတွေ ၀ယ်ခြမ်းထားခဲ့ပြီးပါပြီ။ ဒါကြောင့် ကျွန်မတို့ က နောက်နေ့့လည်မှာ ဟင်းဘူးလေးတွေ သွားဝေဖို့ အတွက် မနက် ၅နာရီခွဲ ထချက်ကြမှာပါ။
ဒါကြောင့် ညထဲက လုပ်စရာ ရှိတာတွေ လုပ်ထားနှင့်မယ်ဆိုပြီး ည ၁နာရီကျော်လောက်မှာ လဘက်တွေ ထသုတ်၊ ကော်ဖီတွေ ထဖျော်ပြီး ငါးအူချောင်းပုံးတွေ ဖြည်ကြပါတယ်။ နောက်ပြီး မနက်ပိုင်းမှာ ခွဲဝေပေးမဲ့ နေရာ ၂နေရာစာ ခွဲခြမ်းပြီး ငါးအူချောင်း တွေကို ပလပ်စတစ်အိတ်ဖြည်၊ အတုံးလေးတွေတုံး၊ ကျန်တဲ့ဟာတွေကို ရေခဲတွေ ပြန်ရိုက်နဲ့  အားလုံးပြီးလို့  အိပ်မယ်လို့  အိမ် ပေါ်ထပ်ကို တက်ကြတော့ မနက် ၃နာရီခွဲ၊ မျက်လုံးတွေကလည်း ကြောင်နေကြပြီ။ ဒီတော့ မထူးပါဘူးဆိုပြီး ၀ရန်တာမှာ ထွက်ပြီး စကားစမြည် ထိုင်ပြောကြပါတယ်။
အဲဒီမှာ အားလုံးသော MMG မောင်နှမတွေ အကြောင်းကို ထိုင်ပြောဖြစ်ကြပါတယ်။ ဘယ်သူ့ ကိုတော့ မတွေ့ တာ ကြာပြီ။ ဘယ်သူ ကတော့ စာလာမတင်တာ ကြာပြီ စသည်ဖြင့်ပေါ့။ နောက်ပြီး ၂နှစ်ပြည့်အတွက် စာမူစုမဲ့ အစီအစဉ်၊ ပွဲလုပ်မဲ့ အစီအစဉ် လေးတွေ ထိုင်ပြောရင်းနဲ့  မနက် ၅နာရီသာခွဲ သွားတယ်။ မအိပ်ဖြစ်ပါဘူး။ ဟင်းချက်ဖို့  လုပ်နေတဲ့ အမေလှကို မနက် ၆နာရီ ကျော်မှာ ဆင်းပြီး ၀ိုင်းကူကြပါတယ်။ ငါးအူချောင်းတွေကို ပြန်ကြော်၊ ခရမ်းချဉ်သီးတွေ လှီးဖြတ်၊ ကြက်သွန်တွေ နွှာထောင်းနဲ့  တစ်ယောက် တစ်လက် ၀ိုင်းလုပ်နေကြပါတယ်။
ပြီးတော့ မနက်စာကို အပြင်ထွက် မစားနိုင်တာကြောင့် ကိုလင်းအောင်ပြည့်က မုန့် ဟင်းခါး သွားဝယ်ပေး ပါတယ်။ မနက်စာ ငါးအူ ချောင်းတွေ ဟင်းချက်ပြီးရင် လင်းလွန်းပင် ရပ်ကွက်လေးမှာ ဘူးတွေနဲ့  ထည့်ပြီး သွားဝေကြမှာပါ။
ညနေပိုင်းကျရင်တော့ ဇကာတန်းရပ်ကွက် (လယ်တော်ကုန်း အနီးမှာ) နေထိုင်တဲ့ ရေဘေးသင့် ပြည်သူတွေ ကို မစိုးရိမ် ကျောင်းတိုက်မှာ ထမင်းကျွေးဖို့  စီစဉ်ထားပါတယ်။ ဒါကြောင့် မနက်ပိုင်း ကျွန်မတို့  ချက်ပြုတ် နေစဉ်မှာပဲ ညနေပိုင်း မစိုးရိမ်ကျောင်းတိုက်မှာ ချက်ပြုတ်ဖို့  ပစ္စည်း တွေကို ည က ကြိုချိန်း ထားတဲ့အတိုင်း တာဝန်ရှိတဲ့ လူကြီးတွေက လာယူကြပါတယ်။
နောက်ပြီး ဆရာတော်ကိုလည်း ညနေစာ ထမင်းကျွေးဖို့  မလျှောက်ထားရသေးတာမို့ ကိုလင်းအောင်ပြည့်က လိုက်သွားမှာ ဖြစ်သလို သူတို့ ကို ဘယ်လို ချက်ရမလဲဆိုတာ တခါထဲ ပြပေးခဲ့ဖို့  ကျွန်မပါ လိုက်သွားခဲ့ ပါတယ်။ လမ်းမှာ လဘက်ရည် ၀င်သောက် မုန့် စားပြီး မစိုးရိမ်ကျောင်းတိုက်ကို သွားခဲ့ကြပါတယ်။
ဟိုရောက်တော့ ကိုလင်းအောင်ပြည့်က ဆရာတော်ကို လျှောက်ထားနေချိန်မှာ ကျွန်မကတော့ ညနေပိုင်း ဟင်းကူချက်ဖို့  ရောက် နေတဲ့ အမတွေကို ဟင်းချက်ဖို့  အစီအစဉ်ပြောရင်းနဲ့  ငါးအူချောင်းတွေ အပြီး လုပ်ပေးခဲ့ပါတယ်။ နောက်ပြီး ဒီနားက တာကလေး မြို့ သစ်မှာ ရေဘေးသင့် မိသားစု ၁၂၀ကျော်ရှိတယ်လို့  သိရပါတယ်။ ဒီလူတွေကို ကျွေးမှာလို့  သိရပါတယ်။ ကလေးတွေ ဘာတွေပါ ပေါင်းရင် လူ ၂၀၀ ကျော်လောက် ဆိုတာကြောင့် ကျွန်မ မျက်လုံးပြူးသွားပါတယ်။
ညက ပြောကြတော့ လူ ၁၀၀စာလောက်လို့ ပဲ ပြောတာလေ။ ဒါကို ကျွန်မက ၁၅၀စာလောက် ဖယ်ထား တာပါ။ ခု ၂၀၀စာဆိုတော့ သူတို့ နဲ့  စကားပြောနေပေမဲ့ ကျွန်မ ရင်နည်းနည်းတုန်နေပြီ။ အင်း မြန်မြန်ပြန်ပြီး ဟိုမှာ ကျန်တဲ့ဟင်းတွေထဲက ပြန်ချန်မှ ဖြစ် တော့မယ်လို့  စဉ်းစားနေမိတာ။
ထမင်းကျွေးဖို့  ဆန်ကိုတော့ ဆရာတော်က သူ့ ဆီကပဲ ယူဖို့ ပြောပါတယ်။ လာလှူတဲ့ ကျွန်မတို ကို ၀န်ပိမှာ စိုးလို့ လို့ ပြောပါ တယ်။ ထမင်းကျွေးမှာဆိုတော့ အရည်ဟင်းတစ်ခွက် ချက်ရအောင် ဆိုပြီး ကုလားဟင်း ချက်ဖို့  တိုင်ပင်ပြီး လိုတာတွေကို သွားဝယ်ဖို့  ပိုက်ဆံ ထုတ်ပေးလိုက်ပါတယ်။ ဈေးဝယ်တဲ့သူ ထွက်သွားပြီး ခါမှ သူတို့ က ထပ်ပြောလာပါတယ်။ လူကတော့ ၂၅၀ လောက်ဖြစ်မယ်တဲ့။ ဟိုက် …. မလွယ်ကြော။ ကိုလင်းရေ မြန်မြန် ပြန်ကြစို့ ။
ဒီလိုနဲ့  ကျွန်မတို့  ပြန်လာပြီး ဈေးထဲဝင် လိုအပ်တာ စဉ်းစားပြီး လိုက်ဝယ်ပြီး ပြန်လာခဲ့တာ အိမ်နားရောက်မှ ဟင်းထည့်မဲ့ဘူး မပါလာသေးဘူးလို့  ဖုန်းလှမ်းဆက်တာကြောင့် တခါပြန်ပြီး ဈေးဘက် ပြန်လှည့်ရပါတယ်။ ပထမတော့ နေ့ ခင်းပိုင်း လင်းလွန်းပင် ရပ်ကွက်မှာ ဟင်းဘူးတွေ ဝေရင် ဆန်ထည့်ဝေဖို့  စဉ်းစားခဲ့ပေမဲ့ ဘဏ္ဍရေး အခြေအနေက သိပ်မကောင်းတော့ပါဘူး။ ဒါကြောင့် အစီအစဉ်ပြောင်းပြီး ခေါက်ဆွဲထုတ်တွေ ၀င်ဝယ်၊ ဖော့ဘူးဝယ်ပြီး ပြန်လာခဲ့ပါတယ်။
အိမ်ရောက်တော့ အမေလှက ဟင်းတွေ ထည့်ဖို့  အဆင်သင့် ကျက်နေခဲ့ပြီ။ ဒါကြောင့် အိမ်ပေါ်တောင် မတက်ပဲ တန်းပြီး ဟင်း တွေထည့်၊ နောက်ပြီး အမေလှကိုလည်း ညနေ ကျွေးဖို့  တ၀က်လောက် ချန်ထားဖို့  ပြောရင်း ဟင်းတွေ ထည့်ကြပါတယ်။ ဒီနေရာ မှာ ကြော်ငြာဝင်ရရင် ကျွန်မယူလာတဲ့ ငါးအူချောင်းက အရမ်းကောင်းတာမို့  နေ့ လည်စာကို ငါးအူချောင်းဟင်းနဲ့  အိမ်မှာရှိတဲ့ ဟင်းတချို့ နဲ့ ပဲ စားလိုက်ပါတော့တယ်။
ထမင်းစားပြီးချိန်မှာ ကိုလင်းအောင်ပြည့် သူငယ်ချင်းရဲ့ ကားလာကြိုတာကြောင့် လင်းလွန်းပင် ရပ်ကွက် မှာရှိတဲ့ သူတို့  ပထမ အကြိမ်တုံးက ထမင်းကျွေးခဲ့တဲ့ ငါးပြား ဓမ္မာရုံ ရှိရာကို လာခဲ့ကြပါတယ်။ ကိုလင်းအောင်ပြည့်ရဲ့ အသိအိမ်မှာ ခဏထိုင်နေတုံး သူတို့ က ငါးပြား ဓမ္မာရုံမှာ လူစုပေးပါတယ်။
ရေဘေး ဒုက္ခသည်တွေက ရေတွေ လည်း ပြန်ကျသွားပြီမို့  ကိုယ့်အိမ်ကိုယ် ပြန်နေနေကြပါပြီ။ ဒါကြောင့် ထမင်းမချက်တော့ပဲ ဟင်းဘူးတွေကိုပဲ ၀ယ်ပေးတော့မယ်လို့  စီစဉ်ထားခဲ့တာပါ။ နောက်ပြီး နေ့ ခင်းတွေမှာ သူတို့ တွေ အလုပ်သွားတဲ့သူနေကြတာမို့  ကလေးအချို့ နဲ့  လူကြီးအချို့ သာ ကျန်ခဲ့ပါတယ်။ ဒါကြောင့် ရှိတဲ့သူလေးတွေကို စုပြီး ကျွန်မတို့ တွေ ဘာတွေပေးသွားလည်း ဆိုတာ အသိပေးပြီး ညနေကျမှ ဆိုင်ရာမိသားစုကို ဝေပေးမှာပါ။
ငါးပြား ဓမ္မာရုံကို ကျွန်မတို့  ရောက်တော့ ကလေးတွေရော လူကြီးတွေပါ ရောက်နေကြပါပြီ။ ကလေးတွေကို ကျွန်မက အိုဗာတင်း အထုတ်လေးတွေကို ဝေပြီး အမေလှက ချိုချဉ်တွေ ဝေပါတယ်။ နောက်ပြီး လူတွေက အစုံမပါတော့ တအိမ်ထောင်စုကို ပေးမဲ့ ပစ္စည်းတွေ ချပြီး ဓာတ်ပုံရိုက်ပြီး ထားခဲ့ပါတယ်။ တစ်အိမ်ထောင်စုကို ဟင်းဘူး ၂ဘူးရယ်၊ အ၀တ် ၂ထုတ်၊ ပိုက်ဆံ ၁၀၀၀ ကျပ်၊ ခေါက်ဆွဲခြောက် ၆ထုတ်ရယ် ဝေပုံကျ ရပါတယ်။ အလှူရှင်တွေ အရှေ့ မှာ ရမဲ့ ပစ္စည်းစာရင်း ပြောပြီး ညနေမှာ လာယူဖို့  ကျွန်မတို့  အရှေ့ တင် မှာနေပါ တယ်။
ကျွန်မတို့ ရဲ့ အလှူလေးက မကြီးကျယ်ပါဘူး။ ခမ်းလည်း မခမ်းနားပါဘူး။ သူတို့ မိသားစုတွေကို ထိုက်ထိုက် တန်တန် မြှင့်တင်ပေး နိုင်လောက်အောင် ဘာမှ မပါပါဘူး။ သူတို့  လိုအပ်ချက်တွေနဲ့  ကျွန်မတို့  ပေးဝေ မှုတွေဟာ ဘယ်လိုမှ မနှိုင်းယှဉ်သာပါဘူး။ ဒါကြောင့် သူတို့ ကို ပြန်တောင် အားနာမိတယ်လို့  အချင်း ချင်း ပြောနေခဲ့သေးတာ။
အားလုံး ပစ္စည်းတွေပေး၊ ဓာတ်ပုံရိုက်လို့  ပြီးသွားချိန်မှာ ဒီဓမ္မာရုံက လူကြီး၊ ဒီရပ်ကွက်ရဲ့ နာယကကြီး က ကျေးဇူးတင်စကား ပြောချင်သေးလို့  မပြန်ပါနဲ့ အုံး ဆိ်ုတာကြောင့် ပြန်ထိုင်ကြပါတယ်။ နောက်ပြီး အဲဒီအဖိုးကို နာယကမှန်း မသိပဲ ကျွန်မက အိုဗာတင်းဘူးလေးတောင် ပေးလိုက်ပါသေးတယ်။
သူပြောတဲ့စကား သူ ပေးတဲ့ဆုကို အစအဆုံး ပြန်မပြောတတ်ပေမဲ့ သူ့ စကား သူ့ အသံက ရင်ထဲကို ထုတ်ချင်းပေါက် ရောက်သွားသလို ခံစားခဲ့ရပါတယ်။ အဲဒီအဖိုးအိုက ဆုတွေပေးရင်း မျက်ရည်တွေလည်၊ အသံတွေ တုန်ပြီး ပြောနေတာပါ။ သူ့ အသံနဲ့  သူ့  စကားက ကျွန်မတို့ ကိုပါ ကူးစက် မျက်ရည်ကျလုပါပဲ။
အရှေ့ ဆုံးမှာ ထိုင်နေတာမို့  မျက်ရည်မကျအောင် ထိန်းထားရပါတယ်။ ဒီဖီလင်က ကျွန်မ တစ်ယောက်ထဲ မဟုတ်ပါဘူး။ အရှေ့ မှာ အတူထိုင်နေတဲ့ ကိုလင်းအောင်ပြည့်နဲ့  ကိုသူရိန်ကိုလည်း ခံစားမိ စေပါတယ်။
သူ့ အသံက တိုးတိုး တုန်တုန်ယင်ယင်လေးမို့  ရှေ့ နားက ကျွန်မတို့ သာ ကောင်းကောင်း ကြားခဲ့ရတာ။
သူပြောတာကတော့ “သူတို့ နေတဲ့ ရပ်ကွက်လေးမှာ ဒီလို ဒုက္ခရောက်နေတာကို ဘယ်သူမှလည်း သိပ်မသိကြပါဘူး။ ဘယ်သူမှလည်း လာမလှူကြပါဘူး။ အစိုးရလည်း လာမလှူပါဘူး။ သူတို့ နေရာမှာ ဒီလိုဖြစ်နေမှန်း မြို့ ပေါ်က လူအကုန်တောင် မသိကြချိန်မှာ ကျွန်မတို့ အဖွဲ့ က ၂ကြိမ် တိတိ လာရောက် လှူဒါန်းကြတဲ့အတွက် အလွန် ၀မ်းမြောက်ကြောင်း၊ ကျေးဇူးလည်း တင်ကြောင်း၊ နောင်လည်း ဒီလိုမျိုးတွေ လှူနိုင်ပါ စေကြောင်း” ကို ဘုရားစာလေးတွေ ရွတ်ပြီး ဆုပေးသွားတာပါ။
အဖိုးအိုရဲ့ ဆုတောင်းကို ကြားပြီးချိန်မှာ ကျွန်မ အရမ်းကို ကျေနပ်သွားမ်ိပါတယ်။ ကျွန်မတို့ တတ်နိုင်တဲ့ ပမာဏ သေးသေးလေးနဲ့  လှုဒါန်းလိုက်ပေမဲ့ ရရှိတဲ့သူတွေဟာ သူတို့ ကို ဂရုစိုက်မှု ပေးတယ်ဆိုတဲ့ ကြည်နူးမှု တစ်ခုနဲ့ တင် အတော့်ကို တန်ဖိုးရှိသွားပါပြီ။ ကျွန်မ တို့ ရဲ့ သဲပွင့်လေးတွေဟာ အကျိုးမဲ့ မဖြစ်တော့ပါဘူး။ နောင်ကို ဒီလို သဲပွင့်လေးတွေ များလာခဲ့ရင် သူတို့ အတွက် အထောက် အကူ တစ်ခု ဖြစ် လာပါလိမ့်မယ်လေနော်။
တကယ်တော့ သူတို့ ဟာ MMG ဘာလည်းဆိုတာကို မသိကြပါဘူး။ သိအောင်လည်း ကျွန်မတို့  ပြောမပြ ခဲ့ကြပါဘူး။ ဒါပေမဲ့ သူတို့ ဟာ MMG ဆိုတဲ့ ခေါင်းစဉ်တပ်ပြီး ရောက်လာကြတဲ့ ကျွန်မတို့ တွေကို ဘာမှန်း မသိပေမဲ့ လှိုက်လှိုက်လှဲလှဲ ကျေးဇူးတင်နေကြပါတယ်။ ဒါဟာ နောက်ဆက်လုပ်မဲ့ လုပ်ငန်းတွေအတွက် ရရှိတဲ့ ခွန်အားလို့ ပဲ ကျွန်မက ခံယူပါတယ်။
ဒါကြောင့် ဒီတခေါက် အလှူလေးဟာ အရမ်းကို စိတ်ချမ်းသာရပါတယ်။ ဒါကြောင့် အလှူပါဝင်သူတွေရော၊ အလှူမပါဝင်ပေမဲ့ ဒီစာ ဖတ်နေတဲ့ MMG အဖွဲ့ ဝင်တွေကိုရော ၀မ်းမြောက် ၀မ်းသာ သာဓုခေါ်နိုင်အောင် တင်ပြလိုက်ရပါတယ်နော်။ နောက်တပိုင်းမှာ စတုဒီသာ မြင်ကွင်းလေးနဲ့  ဆက်လက် မုဒိတာ ပွားနိုင်အောင် ကျွန်မ တင်ပြပါအုံးမယ်နော်။
0 comments:
Post a Comment